Çarşenbe künü, oktâbrniñ 28-nde, «Qırım inciri. Demirci» kitabınıñ online taqdim merasimi ötkerilecek. Kitapta ukrain ve qırımtatar tillerinde şiiriyet ve nesir toplandı. Bu aqta Facebooktaki merasim ilânında aytıla.
«Qırım aqqında zemaneviy metinlerniñ ekinci bediiy kitabınıñ tertipçisi olmaq menim içün şahsiy bir vaqia ola. Bu yıl «Qırım inciri» kitabınıñ adına Demirci sözüni qoştıq – bu Aluşta civarındaki dağ. Sovetler zamanında bu güzel manzaralı ve mücizeviy qayalı dağnıñ bozulğan «Demerci» adı bar edi, şunıñ içün kitabımızda kerçek adınıñ qaytarıluvı maña timsaliy kele», – dep ayttı kitapnı tertip etkenlerden biri Alim Aliyev.
Canlı yayın saat 19:00-da Facebookta «Vıdavnıtstvo Starogo Leva», Qırım evi ve Qırım.Aqiqat saifelerinde olacaq.
Daa evel Kyivdeki «Qırım evi» «Qırım inciri» şair, nesirci ve tercimanlar yarışına işler qabul etile, dep ilân etti.
«Qırım inciri» ilk yazıcılar yarışı 2018 senesi yazda ötkerildi. Yarışqa bütün Ukrainadan 135 müellifniñ 244 işi keldi.
Bıltır Aqmescitteki ekinci «Hizb ut-Tahrir davasınıñ» mabüsi Osman Arifmemetov ve Bağçasaraydaki ekinci «Hizb ut-Tahrir davasınıñ» mabüsi Server Mustafayev «Qırım inciri» ekinci edebiyat yarışı çerçivesinde «Söz serbestligi» nominatsiyasında mukâfat aldı.
