Gece Kefe cermay bazasına qarşı ücüm neticesinde 11 savut zarar kördi, 10-unıñ yaqıtı bar edi, 830 insan tahliye etildi. Bu aqta ASTRA Telegram kanalı Rusiye Federatsiyası İç işler nazirligindeki menbalarına esaslanıp yaza.
«Böyle ücümler neticesinde 11 tsisterna zarar kördi, 8-i dizel yaqıtı tolu edi (5 ve 10 biñ kubometrlik) ve eki benzin tsisternası. Daa bir danesi boş edi. Telükeli yerden tahminen 830 insan tahliye etildi, olarnı vaqtınca yerleşüv noqtalarına yerleştirgenler, bir qısmı soy-soplarına ketti. Akimiyet Vladislavovka – Kefe yolunıñ 92 km areketini toqtattı», – dep aytıla haberde.
Rusiye akimiyeti ve Rusiye Fevqulâde vaziyetler nazirligi darbe aqibetleri aqqında resmiy bir malümat bermediler. ASTRA seslendirgen malümatnı teşkermek cenk vaziyetinde imkânsız ola.
Bundan evel Kefedeki cermay bazasına oktâbrniñ 13-ne keçer gecesi kene uçucısızlar ücüm etkenini Rusiye kontrolindeki Qırım yolbaşçısı Sergey Aksenov bildirdi.
«Krımskiy veter» Telegram kanalı abunecileriniñ malümatına esaslanıp, darbe neticesinde büyük yanğın çıqtı, qızarıntı onlarnen kilometr uzaqlıqta köründi, dep yazdı. Telegram kanalı büyük yanğın körüngen foto ve videolarnı derc ete.
Azatlıq Radiosınıñ Ukrayina telükesizlik hızmetindeki menbası haber etkenine köre, oktâbrniñ 13-ne keçer gecesi Ukrayina telükesizlik hızmeti ve Ukrayina Silâlı quvetleri mahsus tedbirler küçleriniñ «A» Mahsus operatsiyalar merkeziniñ uçucısızları Ukrayinağa qarşı cenkke çalışqan obyektlerge ücüm etti.
Kefedeki cermay terminalına qarşı evelki darbe oktâbrniñ 6-na keçer gecesi endirildi, bu aqta yerli telegram kanalları bildirdi, soñra Ukrayina silâlı quvetleri de haber etti. Bu terminal Ukraytna Mudafaa küçleriniñ ücümlerine ilk sefer oğramay. Rusiye-Ukrayina cenki vaqtında 34 rezervuardan 12-si zarar kördi.
Kefedeki cermay terminalı Ukrayina ücümlerine endi oğrağan edi – Ukrayina silâlı quvteleri 2024 senesi oktâbrniñ 7-ne keçer gecesi cermay bazasına ücüm etken edi. Kefedeki cermay bazasında yanğın bir aftadan ziyade devam etti.
Terminal yılda 12 million tonna cermay malı keçirgen ve aynı vaqıtta 250 biñ tonna mal saqlamaq içün savutları olğan eñ büyük soyu ola.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.
