Dekabrniñ 14-nde Primorskiy qasabasında (Kefe) Rusiye quvetçileri 23 yaşındaki qırımtatar Kurtumer Çalgozovnı tuttılar. Bunı «Qırım birdemligi» cemaat birleşmesinde bildirdiler.
Tutulğannıñ anası Selime Çalgozovanıñ birleşmege aytıp bergenine köre, tintüv saba saat 5:15 başlanğan ve 3 saat devam etken. Kurtumerniñ telefonını tutıp alğanlar. Tintüvden soñ soyları munasip protokolnı imzalağanlar. Qayd etilgeni kibi, tintüv vaqtında evde Çalgozovlarnıñ bütün aile azaları buluna edi - baba, ana, Kurtumer ve onıñ eki qız qardaşı, birisi 7 yaşında eken.
«Qapını qaqqanlarından uyandıq. Qapını pek qaqtılar. Başta qaynanama telefon etkenler, soñ bizge kirip, "Çalgozov Kurtumer Memetoviç mında yaşaymı?", dep soradılar. Men e, dedim. "Çağırıñız onı", dediler. Aqayımnı uyattım, o çıqtı, soñra oğlum özü çıqtı. Oña oqudılar: "Böyle böyle birisini bilesiñmi?". O, bilmeyim, dedi. "Şimdi tintüv keçirecekmiz" dediler. Soñra er şeyni avdarıp başladılar. Narkotikler, yasaq etilgen edebiyatnı ve silâ qıdır başladılar. Men, kesken cihazlar tek aşhanede olğanını ayttım. Soñ mebelni baqtılar, er şeyni avdardılar, baqtılar, yerine qoydılar, yazıp aldılar ve alıp keteceklerini attılar. "Biz onı özümiz kitirirmiz, ya da qaytmaq içün yolğa para berirmiz" dediler, amma qayda, nege alıp ketkenlerini aytmadılar. Babamıznı qaba şekilde divan üstüne yatqızdılar, amma silâ qullanmadılar», – aytıp berdi Selime Çalgozova.
Şimdiki vaqıtta ne sebepten Çalgozov tutulğanı belli degil. Soyları qayda onı alıp ketkenlerini bilmeyler.
Soylarnıñ bildirgenine köre, Kurtumer furunhanede çalışa, ciu-citsu ile oğraşa, kimerde yarışlarda iştirak ete.
