Aprelniñ 8-nde saba saatlarında Kefede patlav sesleri eşitilgen. Bunı yerli telegram kanalları haber eteler.
"Kefede Drujbı soqağında eki kuçlü patlav sesi eşitildi, maşna signalizatsiyası işledi... Er kes eşitti. Amma tütün ve daa bir şeyler körünmedi. Aqayım Eski Qırımda edi ve o da patlav seslerini eşitti, amma olar küçlü degil edi... Patlav sanki yanımda edi. Dostlarım pilotsız uçaq urıp tüşürilgenini tahmin eteler", - dep yazalar yerli telegram kanallarında.
Qırımnıñ işğal yolbaşçısınıñ mesleatçısı Oleg Krüçkov bölgede ava mudafaası sisteması işlegenini iddia ete.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
