Kefe yanında Eçki Dağnıñ cenübiy capında olğan yanğınnı söndürilgen, dep bildirdi Rusiye FVN-niñ Qırım idaresiniñ başı Sergey Şahov.
Oña köre, bazarertesi künü saba başlanğan yanğın o künü aqşam 21:40 söndürildi. Onıñ söndürmesinde yanğıncılar ve Sudaq orman avcılı hocalığınıñ hadimleri iştirak etti.
"Yanğın yeri yoldan bayağı uzaq edi, o yerge maşna tsisternasınen barmağa çare yoq edi. Em de küçlü yel işke pek keder etti - ateş captan capqa tez avuşa edi ve ep tarqalmaqta edi", - dep yaza Şahovnıñ sözlerinde matbuat hızmeti.
Bundan ğayrı memur, Qırım gidrometeomerkezine köre, Kefe ve Aluştada fevqulâde yanğın telükesi ilân etilgen edi, dep bildire.
