Kefede koronavirus ve pnevmoniya olğan 84 kişi hastahanege alındı, pandemiya başlağanından 1428 hasta qayd etildi. Bu aqta Rusiye kontrolindeki şeer memuriyetiniñ matbuat hızmeti bildirdi.
Bundan ğayrı, derc etilgen malümatqa köre, epidemiya sebebinden mektepten evelki müessiseniñ gruppası ve mektep sınıfı uzaqtan oquy. Keçken afta şeerde 60 yañı koronavirus hastası qayd etildi, dep bildirile.
«Keçken afta polis hadimleri maska rejimi bozulğanına dair 23 ve koronavirus hastalarınen alâqada olğan insanlar tarafından özüni izolâtsiya etüv rejiminiñ bozuluvına dair 2 protokol tizdi. Şeer memuriyetiniñ belediye kontroli idaresiniñ hadimleri keçken afta 1003 obyektni kontrol etip teşkerdi. Rospotrebnadzor bölügine qayd etilgen bozuvlar aqqında 2 protokol yollanıldı», – dep aytıla haberde.
Keçken künü Qırımda 151 yañı koronavirus hastası qayd etildi, 11-iniñ hastalıq alâmetleri yoq. Fevralniñ 2-nde, Rusiye akimiyetiniñ malümatına köre, 7 COVID-19 hastası vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
