Kefede oktâbrniñ 10-nda, daa oktâbrniñ 7-nde ücüm etilgen neft bazasında yanğın devam ete.
Yerli sakinlerniñ bildirgenine köre, qara duman alâ daa sıñırda tura. Bundan ğayrı, yaqındaki evlerniñ pencereleri qırıldı, amma bu malümatnı şeerniñ Rusiye akimiyeti tasdıqlamay.
Rusiye Federatsiyasınıñ kontroli altında olğan Kefe yolbaşçısı İgor Tkaçenko oktâbrniñ 10-nda 1137 insannıñ tahliye etilmesi aqqında esabat berdi. Şeerde yanğınnı söndürmek içün suv sarf etilgeni sebebinden içme suvunıñ keyfiyeti fenalaşa bile, dep bildire "Voda Krıma" müessisesi.
Rusiye memuriyeti yerli sakinlerni oktâbrniñ 10-nda Rusiye arbiyleri şeerde atış talimleri keçirecekleri aqqında tenbiledi.
Kefedeki neft bazasına oktâbrniñ 7-ne keçken gecesi ücüm etildi. Ukrayina Silâlı quvetleriniñ Baş ştabı neft bazasını "Rusiye Federatsiyasınıñ işğalci ordusınıñ ihtiyaclarını temin etmek içün de qullanalar" dep ilân etti. Kütleviy haber vastaları yazğanına köre, Kefe neft taşuv terminalı — Qırımdaki eñ büyük terminal.
ASTRA-nıñ malümatına köre, neft bazasına eki ATACMS raketasınen ücüm etildi. Bunıñ neticesinde eñ az 10 ve 5 biñ kubometr tolu olğan eki tsisterna zarar kördi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
