Rusiye kontrolindeki Kefe yolbaşçısı Sergey Bovtunenkonıñ yanvarniñ 6-nda bildirgenine köre, «bir aftada koronavirusqa oğrağanlarnıñ sayısı eksildi» – 82 insan.
Onıñ malümatına köre, yañı koronavirus yuqunçı ve pnevmoniya diagnozı olğan 140 hasta şeer hastahanesiniñ yuqunç bölünide yata.
«Ekimlerimizge yardım etmek içün 2 mütehassıs Aqmescitten keldi. Bayram ve raatlıq künlerinen bağlı izoltsiyanıñ müsbet neticeleri körüne», – dep yazdı o, Facebookta.
Bunıñnen beraber, Kefe yolbaşçısı qayd etkenine köre, keçken afta politsiya hadimleri epidemiya ile küreş tedbirleri bozulğanı sebebinden künde 5-6 protokol tizgen edi. Bovtunenko, Milât bayramını qorantanen qayd etmege çağırdı.
Qırımda bir künde 225 koronavirus hastası qayd etildi. Umumen pandemiya vaqtında 26702 COVID-19 hastası qayd etildi, tüzelgen 21009 kişi çıqarıldı, 556 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
