Kefe başlıqları bölgede koronavirus hastalarınıñ sayısı artqanını bildireler. Berilgen malümatqa köre, keçken afta Kefede 145 hasta qayd etilgen, pandemiya başlağanından berli 1222 kişi hastalanğan, yuqunç bölüklerinde 114 adam tedaviylene eken.
Rusiye idaresinde olğan Kefe başı Sergey Bovtunenkonıñ haber etkenine köre, Kefe tibbiyet merkeziniñ baş ekimi Andrey Verbov, poliklinikadaki nevbetlerge ve ekimlerniñ yetişmemezligine diqaqat çekken.
"Al-azırda 30 terapevt yerine tek 11 çalışa. Elbette, bu qıyın vaziyette ekimlerge tüşken yük muazzamdır, olar toqtamayıp çalışalar. Etrafta hastalarnıñ sayısı artqanını köz ögüne alıp, mütehassıslar tevsiye etken ihtiyat tedbirlerine şimdi hususa riayet etmelimiz", – yazdı Bovtunenko Faceboookta.
Pandemiya başlağanından berli Qırımda resmiy şekilde 28180 hasta qayd etilgen, 22690 tüzelgen ve 613 ölgen. Aqyarda yılnıñ başından 7939 adam yañı koronavirus yuqunçına oğrağan, 7158 tedaviylengen, 294 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
