Kefede cermay bazasındaki yanğın sebebinden Keriç şossesinde areket sıñırlandı, dep haber ete Rusiye akimiyeti.
Qırımnıñ maşina yolları hızmeti bildirgenine köre, areket aylanma yolundan kerçekleştirile. Kefeniñ Rusiye memuriyet yolbaşçısı İgor Tkaçenko haber etkenine köre, Kefe-Vladislavovka şeer trenleriniñ areketi «tehnik sebeplerden vaqtınca toqtatıldı».
«Krımskiy veter» Telegram kanalı Rusiye kütleviy haber vastalarınıñ malümatına esaslanıp, Kefe cermay bazasına qarşı darbe neticesinde üç kişi yaralandı, dep haber ete. Rusiye akimiyeti bu malümatnı izaatlamadı.
Berilgen malümatqa köre, Kefede oktâbrniñ 7-ne keçer gecesmi patlavlar oldı, Qırımnıñ Rusiye yolbaşçısınıñ mesleatçısı Oleg Krüçkov cermay bazasında yanğın çıqtı, dep bildirdi.
«Kefe cermay bazasında yanğın. Fevqulâde vaziyetler nazirligi çalışa. Ölgen ve yaralanğanlar yoq», – dep yazdı Krüçkov.
«Krımskiy veter» Telegram kanalı Saq, Aqmescit ve Qurman rayonlarında patlavlar aqqında bildirdi.
Kefede yanğan cermay bazası – AO «Morskoy neftânoy terminal» – Qırımda cermay malları miqdarına köre eñ büyük ola.
2024 senesi mart ayında oña Ukrayina Silâlı quvetleriniñ dronları ücüm etti, o vaqıt yaqarlıq ketken magistral boru zarar körgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
