Kefede cermay bazasında yanğın aqqında haber etile, Rusiye akimiyeti insanlar tahliye etile, dep bildire. Kefede saba saat 4.20-de bir qaç küçlü patlav oldı. Qırım.Aqiqat mühbiri bildirgenine köre, sesler ava mudafaa sistemasınıñ işine oşadı. Soñra Kefe cermay bazası üstünde qoyu tuman köterilip başlandı.
Şeer akimiyetiniñ malümatına köre, cermay bazasında yanğın çıqtı, yanğınnı söndürmege tırışalar. Sebepleri aytılmay.
Saba saat 8:30-da yanğın devam ete, Rusiye kontrolindeki yerli akimiyet yaqınlarda yaşağan insanlarnı tahliye etip başladı.
Berilgen malümatqa köre, Kefede oktâbrniñ 7-ne keçer gecesmi patlavlar oldı, Qırımnıñ Rusiye yolbaşçısınıñ mesleatçısı Oleg Krüçkov cermay bazasında yanğın çıqtı, dep bildirdi.
«Kefe cermay bazasında yanğın. Fevqulâde vaziyetler nazirligi çalışa. Ölgen ve yaralanğanlar yoq», – dep yazdı Krüçkov.
«Krımskiy veter» Telegram kanalı Saq, Aqmescit ve Qurman rayonlarında patlavlar aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.