Aqmescit (Simferopol) - Kefe (Feodosiya) yolunda iyül 10-unda gece yengil maşnanen yük maşnası uruldı, üç adam elâk oldı, olarnıñ arasında 2 bala, dep bildire Rusiye İİN-niñ Qırım idaresi.
"Kefe yanında yol qazası oldı, onda üç adam elâk oldı, olarnıñ arasında eki bala, daa bir bala yaralandı. Şimdi olğan malümatqa köre, Hyndai maşnasınıñ aydavcısı, Qarasuvbazar tarafından Keriçke ketkende, yaqınlaşıp turğan yük maşnası ögüne qarşı yolaqqa çıqtı", - denile beyanatta.
Rusiye polisine köre, yol qazası qararnen saat 2:00 oldı. Şimdi qaza yerinde yol areketine mania yoq.
Qırımlı qurtarıcılarnıñ bildirgenine köre, Qırımda ciddiy yol qazalarınıñ sayısı arttı. Qırımda 2019 senesiniñ birinci üç ayında keçken yılğa baqqanda bir buçuq qat ziyade aydavcı mesüliyetke çekildi.
