İşğal etilgen Qırımdaki Kefe şeerinde Ukrayina uçucısızlarınıñ yañı darbelerinden soñ Mudafaa quvetleriniñ 2025 senesi oktâbr ayında yapqan ücümlerden soñ qalğan eñ az eki rezervuar yana, dep haber ete aprelniñ 8-nde aqşam Azatlıq Radiosınıñ "Shemı" leyhası.
"Planet Labs tarafından aprelniñ 8-nde yapılğan ve "Shemı" (Azatlıq Radiosı) jurnalistleriniñ elinde olğan fotoresimlerde Rusiye işğal etken Qırımnıñ esas cermay bazasında yanğın ve tuman körüne – Kefedeki "Deñiz cermay terminalı"… Uydu malümatına köre, kündüz saat 12-nde cermay bazasında büyük yanğın devam ete", – dep aytıla haberde.
Bugün Ukrayina Silâlı quvetleriniñ Uçucısız sistemalar küçleriniñ komandanı Robert Brovdi ("Madâr" tahallüsli) Kefe cermay bazasına qarşı muvafaqiyetli ücüm aqqında bildirip, fotoresimlerini derc etti.
Ukrayina uçucısızları aprelniñ 8-ne keçer gecesi işğal etilgen Qırımnıñ Kefedeki "Deñiz cermay terminalı" cermay bazasına ücüm etti, dep bildirdiler saba Astra ve Ukrayina monitoring kanalları.
Rusiye terminalğa qarşı ücüm yapılğanını resmiy şekilde tasdıqlamadı. Kefeniñ Rusiye akimiyeti "meydanğa kelgen vaziyet sebebinden" bir qaç soqaqta naqliyat keçişi qapatıldı, dep bildirdi.
Rusiyeniñ büyük istilâsı başlağan soñ Rusiyede ve işğal etken topraqlarında çeşit obyektler ava ücümlerine oğray. Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.