Fevralniñ 11-nde aqşam ve fevralniñ 12-nde saba Rusiye işğal etken Qırımda patlavlar ve atışlar eşitildi. Bu aqta yerli saifeler ve Qırım.Aqiqat mühbiri bildirdi.
"Krımskiy veter" Telegram kanalı abunecileriniñ malümatına esaslanıp, fevralniñ 11-nde aqşam Kefede ve fevralniñ 12-nde saba erte Sarabuzda patlavlar aqqında haber etti.
"Saat 4:09-da Sarabuzda küçlü patlav oldı, garnizonda sirena çalıştı", – dep yazdı Telegram kanal.
Qırım.Aqiqat mühbiri Kefede patlavlar aqqında bildirdi ve tünevin aqşam da şeerde atış aqqında haber etti.
Bundan ğayrı, yarı gecege yaqın Rusiye işğal etken Aqyarda (yerli vaqıtnen 23:16-da) ava telükesi ilân etilgen edi. Bu aqta Rusiye kontrolindeki şeer yolbaşçısı Mihail Razvojayev haber etti. 30 daqqadan soñ o, ava telükesi aqqında haber etti.
Yerli telegram kanalları ava telükesi ve raketa telükesi aqqında yazdılar.
Monitoring telegram kanalları ava telükesi vaqtında deñiz yolcu ve yer üstü cemaat naqliyatınıñ areketi toqtatıldı, dep bildirdi.
Rusiye Mudafaa nazirligi haber etkenine köre, keçken gece devamında "ava mudafaasınıñ nevbetçi vastaları 106 Ukrayina uçucısızını tutıp yoq etti, Qırımda 5 uçucısız, Qara deñizde – 1 ve Azaq deñizinde – 4".
Yerli Rusiye akimiyeti vaziyetni izaatlamay. Rusiye Federatsiyasınıñ Mudafaa nazirligi ücüm aqibetleri aqqında şimdilik haber etmey. Ukrayina arbiyleri darbeni tasdıqlamadı.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.