Rusiyeniñ nezareti astında olğan Kefe mahkemesi 37 yaşındaki yerli sakinni içtimaiy ağlarda RF ordusını "itibardan tüşürüv" maddesi ile 1,5 yıl apis cezasına mahküm etti.
Mahkemeniñ matbuat hızmetinde qayd etkenleri kibi, evel erkek aynı areketler içün memuriy mesüliyetke endi çekilgen edi.
"Mahkeme oturışı vaqtında qabaatlı suçunı tanıdı ve peşman olğanını bildirdi", - dep yazıla bildirmede.
Cezasını Kefe sakini yerleşme cezahanesinde çekecek, dep yazıla bildirmede. Bunda ğayrı internet qullanma aqqı üç yılğa sıñırlanacaq.
Erkekniñ adı ve soyadı belli degil, açıq izaatları da yoq.
Daa evel RF nezareti astında olğan Qırımnıñ Lenino rayon mahkemesi yeri sakinler Lenur Halilov ve Dmitriy Kamışantsevge Rusiye ordusını "itibardan tüşürüv" içün 40 biñ ruble para cezasını tayin etkeni edi.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
