Qırımda Rusiye uquq qoruyıcıları Rusiye arbiy tehnikası aqqında malümat toplap, onı Ukrayinağa bergeninde qabaatlağan 45 yaşında Kefe sakinini tuttı. Bu aqta Rusiye kütleviy haber vastaları Rusiye Federatsiyası FSB Cemaat bağları merkeziniñ malümatına esaslanıp yaza.
Berilgen malümatqa köre, erkek Telegram vastasınen Qırımnıñ ava boşluğını patrul etken tehnikanıñ fotoresimlerini berdi. Adı ve soyadı aytılmay.
Soñra Rusiye kütleviy haber vastaları Rusiye FSBsiniñ videosını derc etti, anda tutulğan olaraq tanıtılğan kişi Rusiye uquq qoruyıcılarınıñ aytqanlarını tasdıqlay. Bu videonıñ basqı altında çıqaruv ihtimali bar, FSBniñ tutulğanğa qarşı aytqanlarını cenk şaraitlerinde alternativ menbalarda teşkermek zor.
Al-azırda qırımlığa qarşı Rusiye Federatsiyası Ceza kodeksiniñ 275-inci maddesine istinaden cinaiy dava açıldı. İmayesiniñ izaatları şimdilik yoq. Qabaatı isbatlansa, ömür boyu apis cezasını ala bile.
Aq qorçalayıcılar devlet hainligi, Ukrayina ile işbirligi, casuslıq ve diversiya maddelerine istinaden davalarnıñ sayısı artacaq, dep tahmin ete. Şimdi FSB böyle davalarnı aman-aman er kün aça, 2014 senesine qadar ise olarnıñ sayısı yılda eñ çoq 10 edi.