Qırımda gece patlavlar oldı, Ukrayina dronları uçtı, Rusiye mobil ateş gruppaları çalışa, Kefedeki elektrik aststantsiyasında yanğın çıqtı, Aqyarda ava telükesi ilân etildi – bu aqta Rusiye akimiyeti ve yerli Telegram kanalları bildire.
Gece Yalta, Kefe ve Aqyarda (Balıqlava TES civarında) bir qaç patlav ve atış eşitildi.
"Krımskiy veter" Telegram kanalı Kefede "ücüm" aqqında bildirip, "ilk malümatqa köre, Korabelnıy aralığında elektrik aststantsiyasına ücüm etildi", dep yazdı.
"Krımskiy veter" monitoring gruppası uydu çekimleriniñ malümatına esaslanıp, "Kefe civarındaki Hafuz (Primorskiy) qasabasında büyük elektrik aststantsiyasında yanğın qayd etildi. PS 110/35/6 kV "Primorskaya" yana. Kefede PS 110/10/0.4 kV elektrik aststantsiyası darbege oğrağandır".
"Krımskiy veter" abuneciniñ malümatına esaslanıp yazğanına köre, "Gasprada saat 03.00-lerde elektrik aststantsiyasına eki darbe oldı".
Aqyarnıñ Rusiye akimiyeti ava telükesini ilân etti ve Ukrayina dronlarınıñ ücümi, Rusiye ava mudafaasınıñ ve mobil ateş gruppalarınıñ cevap işi aqqında bildirdi.
Rusiye Mudafaa nazirligi saba 17 Rusiye regionı, işğal etilgen Qırım ve Azaq deñizlerinde 223 Ukrayina uçucısızını tuttı ve yoq etti, dep bildirdi.
Ukrayina arbiyleri bu vaziyetni şimdilik izaatlamadı.
Qırım.Aqiqat cenk vaziyetinde bu malümatnı tasdıqlap olamay.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Çoqusı alda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.