Rusiye işğal etken Qırımda "şeerde teraktlarnı aqlağanında" qabaatlanğan Kefe sakinine qarşı cinaiy dava açıldı. Bu aqta Rusiye uquq qoruyıcı müessiseleri haber ete.
Rusiye uquq qoruyıcılarınıñ malümatına köre, erkek Rusiyeniñ yaqarlıq-energetika obyektlerine qarşı ücümler aqqında aytıp, Ukrayina Silâlı quvetlerine qoltutqanını bildirdi.
"O, Kefede yaqarlıq-energetika kompleksi obyektlerine qarşı raketa darbelerinde Ukrayina Silâlı quvetlerine açıq-açıq qoltuttı", – dep aytıla Rusiye müessisesiniñ resmiy haberinde.
Berilgen malümatqa köre, mabüsniñ areketlerine "Qara deñiz flotu Rusiye FSB idaresiniñ operativ hadimleri tarafından mania etildi". Al-azırda tahqiqat bir sıra ekspertiza belgiledi.
Rusiye devlet haber agentlikleri tutulğan kişi apiske alındı, dep bildirdi. Mabüsniñ adı ve soyadı resmiy haberlerde aydınlatılmay.
Daa evel Ukrayina prezidentiniñ Qırım Muhtar Cumhuriyetindeki temsilciligi, Roskomnadzor Rusiye Federatsiyası tarafından işğal etilgen Ukrayina topraqlarında, şu cümleden Qırımda, informasion boşluq üzerinde nezaretni quvetleştire, dep bildirdi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "itibardan tüşürüv" içün yaqalana ve memuriy ve cinaiy mesüliyetke çekile.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.