Rusiyeniñ nezareti altında olğan Qırım demiryolunda, Kefe civarındaki demiryol toşemesiniñ bozuluv sebebi "başqalarnıñ kirişmesi" oldı, dep bildirdiler.
"Qaza neticesinde Kefe - Vladislavovka arasında qatnağan eki şeer civarı treni keç qaldı. Yolcular avtobuslarnen ketmek kerek oldılar. Operativ ve doğru areketler neticesinde eki saat içinde trenler kene yürip başladı'', - dep yazıla bildirmede.
Bugün saba Qırımnıñ işğal reberligi Kefede demiryol toşemesiniñ bozulması aqqında haber etti. Aksönovnıñ mesleatçısı Oleg Krüçkov, töşemeniñ bozulması sebebinden eki saba elektriçkası lâğu etilgenini bildirdi.
İyünniñ 11-nde Aksönov Qırımnıñ İslâm Terek rayonında demiryolnıñ bozulması aqqında haber etken edi.
Mayısnıñ 18-nde Aqmescit rayonında zahire taşığan vagonlar relsten çıqqan edi. Qırımnıñ işğal parlamentiniñ spikeri Konstantinov qazağa "patlatuv" dedi ve bunda Ukrayinana qabaatlaı.
Fevralniñ 23-nde aqşam Bağçasaray rayonında kimligi belli olmağan insanlar demiryolğa zarar ketirdi. Neticede trenlerniñ areketi toqtatıldı.
Qırımda Rusiye uquq qoruyıcılarınen işbirligi yapqan Rusiye tarafdarı bloger Aleksandr Talipov adiseni «diversiya» dep adlandırdı. Onıñ malümatına köre, «patlav olmadı, qaynaqnen çalışıp, bir qısmını kesip alğanlar». O, «şübheliler belli, operativ tedbirler keçirile», dep ayttı. Rusiye uquq qoruyıcıları adiseniñ sebepleri aqqında bir malümat bermedi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
