Kefe cermay terminalı oktâbrniñ 12-nden 13-ne keçer gecesi yañı ücümge oğradı. Toprağınıñ büyük qısmını yanğın qavrap aldı. Bu aqta Telegram kanalları haber ete.
«Krımskiy veter» Telegram kanalı bildirgenine köre, Kefe cermay bazasına kelgen ilk darbe haberi oktâbrniñ 12-nde yarı gecege yaqın oldı. Çıqqan yanğın qızarıntısı Kefeden şimaldeki Eski Qırımdan ve Qırımnıñ Cenübiy yalısından ğarpta Alupkadan köründi.
İşğal etilgen Qırımnıñ Rusiye yolbaşçısı Sergey Aksenov öz Telegram kanalında uçucısızlarnıñ Kefedeki cermay bazasına ücümini tasdıqlap, «neticede yanğın çıqtı», dep qoştı. O, «al-azırda yaralanğanlar yoq. Bütün hızmetler adise yerinde çaalışa», dep ayttı. Onıñ haberine köre, Rusiye «ava mudafaa quvetleri 20-den ziyade uçucısıznı urıp tüşürdi».
Yanğın sarıp alğan cermay bazasınıñ videosını oktâbrniñ 13-nde 1:00-de «NEXTA Live» Telegram kanalı yerleştirdi.
Oktâbrniñ 13-nde saba «ÇP/Krım» Telegram kanalında dronnıñ Kefe cermay bazasına dron ücümi aqqında malümat peyda oldı. Hafuz qasabası (Primorskiy), Qoran Eli (Beregovoye) ve Yaqın Qamış (Blijniye Kamışi) köyleriniñ sakinlerine «merkeziy suv borusından suv berilüvi vaqtınca toqtatılacağından» suv toldurmağa tevsiye etildi. Yerli sakinler cermay bazasındaki yanğın sebebinden cemaat naqliyatınıñ marşrutı deñişti, dep tenbilendi.
Kefedeki cermay terminalına qarşı evelki darbe oktâbrniñ 6-na keçer gecesi endirildi, bu aqta yerli telegram kanalları bildirdi, soñra Ukrayina silâlı quvetleri de haber etti. Bu terminal Ukraytna Mudafaa küçleriniñ ücümlerine ilk sefer oğramay. Rusiye-Ukrayina cenki vaqtında 34 rezervuardan 12-si zarar kördi.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.
