Kefeniñ Rusiye akimiyeti cermay yaqınlarındaki yolda areket qapatıldı, dep bildirdi. Bu aqta Rusiye memuriyetiniñ içtimaiy ağlarında aytıla.
"Keriç yolunıñ Vladislavovkağa doğru qısmı keçişke qapalı qala. Fedko ve Geologiçeskaya soqaqlarında naqliyat areketi sıñırlanğan", – dep haber etile.
Rusiye akmiyeti Fedko ve Geologiçeskaya soqaqlarında areket tek cemaat naqliyatı içün açıq, dep bildirdi.
"№2, 4, 13A marşrutları Fedko soqağından yapıla (Geologiçeskaya soqağına kirmeyler, "Stroydetal" ve "Neftebaza" turaqlarında yolcular tüşürilmey ve alınmay). Fedko soqağı tek cemaat naqliyatına açıq. Şahsiy naqliyatnen keçiş tek Tavrida yolundan yapıla. Vaziyetke köre deñişmeler ola bile", – dep qoştı Rusiye memuriyeti.
Areket qapatılğanınıñ sebepleri haber etilmey.
Hatırlatamız, Qırım.Aqiqat mühbiri Kefe cermay kompleksinde dron ücüminden soñ devam etken yanğın aqqında biildirdi: "qara tuman deñizge doğru kete, cermay bazası ve avtostantsiya yanında maşina keçişi kene qapatıldı».
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etkenini tasdıqlamay.