Aqyarda 13-nci mektebinde balalarnen umumiy fotoresim çekilgende balkon omradı. Al-azırda 10 zararlanğan kişi aqqında belli, dep bildirdi şeerniñ rusiyeli başı Mihail Razvojayev.
"Balalarğa yardım kösterile, yaralanğanlarnı hastahanege alıp keteler. Olarnıñ yaraları çeşit derecede. Vaqia sebebini ögrenecekmiz", — dep yazdı Razvojayev.
Rusiyeniñ "Mash on the Wave" telegram kanalınıñ malümatına köre, balkon tüşken mektep talebelerinden biri hastahanede, esini coydı.
Daa evel Razvojayev, 13-nci mektepte 2025 senesi İlk yazda "kapital tamir işleri" yekünlengenini bildirgen edi, onıñ devamında "esas bina, tir ve aşhane tamir etildi".