İşğal etilgen Qırımda 2023 senesi eñ yüksek seviyeli beden ve ruhiy sağlıq aqqınıñ bozulması adisesi eñ az 52 kere qayd etildi, olardan 43-ü qırımtatarlarğa qarşı. 2022 senesiniñ aynı müddetinde 36 bozuv qayd etildi, 2021 senesi ise 135.
Bu aqta Qırımtatar Resurs Merkezi azırlağan Qırımda insan aqlarınıñ bozuluvı talilinde aytıla.
Bozuluvlar, siyasiy mabüslerniñ sağlıqları bozulğanı, advokatlarnıñ ve mabüslerniñ muracaatlarına qulaq asılmağanı, kerekli tibbiy yardım kösterilmegeninen bağlı.
QRM qayd ete ki, al-azırda Rusiye akimiyeti qartlarnı ve ağır hastalıqları olğan saqatlarnı apiste tuta.
"SİZO ve apishanelerde yaramay şaraitte tutulğanları, sağlıqları aqqında şikâyetlerniñ sistematik şekilde körmemezlikke urulğanı, kerekli ve vaqtında olmağan tibbiy yardım kösterilmegeni sebebinden olarnıñ sağlıq vaziyeti fenalaşa", - dep aytıla haberde.
Bundan evel Qırımtatar resurs merkeziniñ yolbaşçısı Eskender Bariyev bildirdi ki, Qırımda 2023 senesi uquq qoruyıcılar 173 yaqalanuv, 65 tintüv, 217 tevqif, 186 sorğu, 300-den ziyade adaletli mahkeme aqqı ve 50-den ziyade sağlıq aqqı bozulğanını qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
