12 ay içinde 26 qırımlı ukrayin timsallerini köstergeni içün memuriy apiske alındı, dep aytıla "Qırım esnası" cemaat teşkilâtınıñ Qırımnıñ Ukrayina tarafdarları taqip etilgeni aqqında araştırmasında.
"Umumen, 2023 senesi iyün ayından 2024 senesi iyün ayına qadar teşkilâtnıñ ekspertleri Qırım sakinleriniñ Ukrayina tarafdarı olğanları içün ekstremistlikke qarşı qanunlar boyunca 59 mahkeme taqibini tasdıqladı. Aman-aman yarısında (45%) işğalci akimiyet qırımlılarnı Rusiye ordusınıñ itibarını tüşürgenleri, huliganlıq yapqanları, migratsion qanunlarını bozğanları içün cinaiy mesüliyetke çekip, bir mahkeme taqipinen sıñırlanmadı, em de "bağışlav videoları" ya da işten boşatuvlarnen qabaatladı", — dep bildire "Qırım esnası".
Cemaat teşkilâtında qayd eteler ki, Qırımdaki Rusiye mahkemeleri esasen natsist timsalleri (bu seneniñ başında Rusiye qanunlarına kirsetilgen) aqqında normativ bazanı qullanmay, öz qararlarında "ekstremizmge qarşı" qanunlarğa esaslanalar, olarda Ukraina mevzusınen bağlı ekstremistik timsalleri aqqında açıq-aydın kriteriyler yoq.
"Qırım esnasında" bildirilgeni kibi, Qırım mahkemelerinde Ukraнinağa qoltutuv aqqında davalarnı baqılğanda, eñ tarqalğan ameliyat - ukraнin timsalleriniñ derc etilmesi faktını belgilemek, onı, adı añılmağan mütehassısnıñ neticeleri yardımınen, Rusiye akimiyetiniñ qararı ile ekstremist tanılğan belli bir teşkilâtnen bağlaylar, ve böyleliknen derc etilgen ukrayin timsalleriniñ ekstremist kategoriyasına aitliginiñ delilleri yekünlene.
"Bazı vaqıtları mahkeme, mahsus bir mütehassısnıñ fikrine esaslanmayıp, belli bir atributnıñ belli bir teşkilâtqa aitligini öz isteginen belgiley. Bazıda ekspert-mütehassıs olaraq Ekstremizmge qarşı küreş merkeziniñ operativ hadimleri ya da mahkemege kerek olğan añlatmalarnı bergen çetke çıqqan insanlar çıqışta buluna. Bundan da ğayrı, mahkemeler sıq-sıq yasaq etilgen (ekstremist sayılğan) teşkilâtlarnı, Rusiye akimiyeti iç bir yasaq qoymayıp, aynı fikirde olğan teşkilâtlarnen qarıştırıp alalar", — dep qoşalar cemaatçılar.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qol tutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ "areketini yaramaylaştırğanı" içün memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
