Teşkilâtnıñ malümatına köre, eki erkek ve dört qadın ğayıp oldı. Altı adisede de Rusiye FSB hadimleriniñ işi bar.
«4-ünde FSB hadimleriniñ tintüvlerinden soñ insanlarnı belli olmağan yerge alıp ketkenler, tuvğanlarına uquqiy statusları ve bulunğan yerleri aytılmadı», – dep qayd ete KrımSOS talilcisi Yevğen Yaroşenko.
Teşkilâtnıñ qayd etkenine köre, bugün Qırım işğali vaqtında 67 insannıñ hırsızlanğanı belli. Soñki qurbanlardan biri Lera Cemilova oldı – Canköy rayonınıñ sakini, 2024 senesi mayıs ayında tintüvden soñ Rusiye uquq qoruyıcıları tarafından tutuldı. Leranıñ bulunğan yeri alâ daa belli degil.
BM insan aqları Monitoring missiyasınıñ malümatına köre, Qırımda işğal başlağanından berli 104 insan hırsızlandı, 21-i ğayıp olğan olaraq sayıla.
2014 senesinden başlap mart ayında 23 insan hırsızlandı. Aman-aman episi – Ukrayina tarafdarı faaller, qanunsız «referendumğa» qarşı çıqqan ediler. Olardan biri – Reşat Ametov, martnıñ 3-nde Aqmescitte Rusiye işğaline qarşı narazılıq bildirmege çıqqan edi. O künü onı «Qırım samooboronasınıñ» iştirakçileri hırsızladı, bir qaç künden soñ Reşatnıñ cesedi işkence izlerinen tapıldı.
2014 senesi martnıñ 7-nde hırsızlanğan Valeriy Vaşçuk ve İvan Bondaretsniñ, em de aynı şu yılı martnıñ 15-nde ğayıp olğan Vasiliy Çernışnıñ taqdiri belli degil.
«23 adiseniñ aman-aman episinde «Qırım samooboronası» azalarınıñ işi bar. 2014 mart ayında insan hırsızlavları Rusiyeniñ ya da kontroli altındaki gruppalarnıñ Ukrayina topraq bütünliginiñ tarafdarlarına qarşı siyaseti olğanını köstere», – dep ayta KrımSOS talilcisi.
Qırımtatar Resurs Merkezi bildirgenine köre, Qırım işğali vaqtında 24 insan ğayıp olğan olaraq sayıla, 18-i tamır qırımtatar halqınıñ vekilleri ola.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
