Kyivde yerleşken V.İ. Vernadskiy adına Tavriya Milliy Universiteti keçken yıl ilhaq etilgen Qırımdan qararnen 400 studentni qabul etti. Bunı TMU rektorı Volodımır Kazarin Qırım.Aqiqatqa intervyü bergende haber etti.
"2019 yılda "Qırım - Ukraina" programması boyunca bizge Qırımdan 200-ge yaqın talebe kirdi, daa 150-180 Donbasstan. Programmadan ğayrı, qırımlılar yıl devamında da keçirileler, bu aq tek yarımada sakinlerinde bar, bu daa 80-90 adam. Üçünciden, köllecimizge doquzıncı sınıftan soñ kireler - 25-30 adam. Dörtünciden, qırımlılarnıñ çoqusı qıtada mekteplerde oquy, attestat ala ve imtianlarnıtapşırıp kire. Yani vesiqalar boyunca olar qırımlılar kibi belgilenmegen, bu tahminen daa 30 abituriyent", - aytıp berdi rektor.
Kazarinniñ aytqanına köre, 2019 yılda Qırım telebelerniñ sayısı umumen 400-ge yaqın ola.
2015 senesiniñ başında Rusiyeniñ Qırım akimiyeti yarımadada «federal universitet»niñ meydanğa ketirilmesini buyurdı. Oña bir qaç aliy oquv yurtu ve bu cümleden yoq etilgen Vernadskiy adına Tavriya milliy universiteti, Georgiyevskiy adına Qırım devlet tıbbiyet universiteti ve bir qaç diger ilmiy muessise kirdi. «Qırım federal universiteti»niñ strukturasına 13 umum tasil ve ilmiy muessise kire.
TMU Ukraina qıtasına 2016 senesi köçti.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
