Cumaaqşamı künü, iyünniñ 4-nde, Ukraina prezidentiniñ Qırım Muhtar Cumhuriyetindeki daimiy vekili Anton Korınevıç işğal etilgen Qırım ve Herson vilâyetiniñ memuriy sıñırını ziyaret etti. O, karantin tedbirleri vaqtında sıñırcılarnıñ işini baqtı.
Bu aqta Ukraina Devlet sıñır hızmetiniñ matbuat hızmeti bildire.
«Körüşüv vaqtında şahıslarnı gumanitar maqsadnen keçirüv nizamı ve karantin vaqtında memuriy sıñırdan keçkende peyda olğan problemli meseleler muzakere etildi», – dep aytıla haberde.
Müessise malümatına köre, keçiş noqtasında İnternet ağı meselesi çezildi, vatandaşlar «Deystvuy doma» («Evde areket et») cep telefonı qullanımını qura bile.
Sıñır hızmetiniñ malümatına köre, kelecek afta «Kalançak» ve «Çaplınka» keçiş noqtalarında wi-fi routerleri qoyulacaq.
Koronavirus sebebinden işğal etilgen Qırım ve Herson vilâyetiniñ memuriy sıñırında kirsetilgen sıñırlavlar iyünniñ 22-ne qadar uzatıldı.
Ukraina Nazirler şurası, işğal etilgen Qırımdan ya da Donetsk ve Lugansk vilâyetleriniñ işğal altındaki yerlerinden esas Ukrainağa kelgen vatandaşlar observatorlarğa yollanılacaq, dep bildirgen edi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
