"Serbest Qırımğa mektüpler" teşebbüsi çerçivesinde Ukrayinalı yırcı Tina Karol 2022 senesi iyul ayında işğal etilgen Qırımda Rusiye uquq qoruyıcıları tarafından tutulğan qırımtatar tili ocası Appaz Kurtametniñ mektübini oqudı. Bu aqta Ukrayina prezidentiniñ Qırım Muhtar Cumhuriyetindeki daimi temsilciligi bildirdi. Video yırcınıñ Instagram saifesinde derc etildi.
Avgustnıñ 19-nda Kurtamet 24 yaşını toldurdı. Dört yıldan berli ise Rusiye apsinde tutula. Tutulmazdan evel qırımtatar tili derslerini bere ve göñülli olaraq faaliyet köstergen edi.
Qayd etilgenine köre, Rusiye akimiyeti onı 500 ğrıvnâ yollağanı içün "silâlı birleşmeni maliye etkeninde" qabaatlap, yedi yılğa azatlıqtan marum etti. Şimdi o, "Vladimirskiy tsentral" apishanesinden etap etilgen Pskov vilâyetiniñ №6 tüzetüv koloniyasında qanunsız tutula.
Temsilcilik Kurtamet ve Ukrayinağa qoltutqanı içün qanunsız bir şekilde azatlıqtan marum etilgen diger Ukrayina vatandaşlarına mektüp yazmağa çağırdı. "Serbest Qırımğa mektüpler" teşebbüsi mektüp yollamağa, aktsiyalar aqqında tarif etmege ve içtimaiy ağlarda malümat tarqatmağa teklif ete.
Qırımtatar faali Elmaz Qırımlınıñ Facebookta yazğanına köre, Rusiye tahqiqatınıñ versiyasına köre, Kurtamet, "Qırım" batalyonında hızmet etkeninden soñra haberi olğan arqadaşına 500 ğrıvnâ yollağan eken. Qırımtatar Milliy Meclisiniñ reisi Refat Çubarovnıñ bildirgenine köre, 2022 senesi iyulniñ 23-nde Kurtamet Herson vilâyeti Geniçesk rayonı Novooleksiyıvka qasabasından işğal etilgen Qırımğa soy-soplarına ketti. Qırım ve Herson vilâyeti arasında Rusiye keçiş noqtasına sağ-selâmet kelgeni belli. Soñra aqrabaları Kurtametnen bağlanıp olamadı. Bundan soñ Rusiye uquq qoruyıcıları tarafından tutuldı.
2023 senesi aprelniñ 20-nde Rusiye qurğan Aqmescitniñ Kiyev rayon mahkemesi 2022 senesi Herson vilâyetiniñ memuriy sıñırından hırsızlangan Appaz Kurtametni 7 yıl sert rejimli koloniyada qalmasına üküm etti. 2023 senesi avgustnıñ 29-nda Rusiye kontrolindeki Qırım Yuqarı mahkemesi Appaz Kurtametniñ ükmüni deñiştirmedi.