Strasburgda Avropa parlamentiniñ Saharov «Fikir serbestligi» mukâfatı berildi. Bu sene oña Rusiyede apiste tutulğan ukrainalı rejissör Oleg Sentsov nail oldı.
Sentsovnıñ mukâfatını advokatı Dmitriy Dinze ve rejissörniñ eki doğmuş qardaşı Natalya Kaplan aldı.
Mukâfatnı Avropa parlamentiniñ reisi Antonio Tajani berdi.
Oktâbrniñ 25-nde Rusiyede mahküm etilgen ukrainalı rejissör Oleg Sentsov Avropa parlamentiniñ Saharov «Fikir serbestligi» mukâfatına nail oldı.
1988 senesinden berli Avropa parlamenti Saharov mukâfatını insan aqları ve fikir serbestligini qorçalağan insan ve teşkilâtlarğa bere.
Keçken sene Saharov mukâfatınıñ laureatları Venesuelanıñ demokratik muhalifeti ve siyasiy mabüsleri olğan edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti. Rusiyede mahküm etilgen Oleg Sentsovnı qurtarmaq çağıruvı ile petitsiya Beyaz Saraynıñ saytında 100 biñden ziyade insan tarafından imzalandı.
