Kanadanıñ Nova Scotia vilâyetinde açılğan ateş neticesinde eñ az 16 insan, şu cümleden politsiya hadimi elâk oldı. Ücüm etken kişi öldürildi. Berilgen malümatqa köre, ateş açqan kişi politsiya urbasını kiyip, politsiya maşinasına oşağan bir maşinanen kete edi, dep haber ete Azatlıq Radiosı.
Ücümden 51 yaşında Gabriel Wortman şübhelene. Kanada politsiyasınıñ yolbaşçısı Brenda Luckiniñ BBC içün bergen malümatında ücüm şimdilik terror ücümi olaraq baqılmay, politsiya şübheliniñ sebeplerini tedqiq etmege devam ete, dep bildirdi. Onıñ aytqanına köre, ücümniñ başında belli bir sebebi bar edi, belki, lâkin soñra areketleri «tertipsiz oldı».
Birinci ücüm cumaertesi künü Portapique şeerçiginde oldı. Evlerden biriniñ içinde ve etrafında bir qaç cesed tapıldı. Şeerde bir sıra ev yanıp başladı. Politsiya ücüm etken kişini 12 saat içinde tesirsiz alğa ketirmege tırıştı.
Kanada baş naziri Justin Trudeau ücümni «qorqunç bir adise» dep adlandırdı. Nova Scotia ükümetiniñ yolbaşçısı Stephen McNeil «vilâyet tarihında eñ manasız zorbalıq aktlarından biri oldı», dep bildirdi.
Şimdiki ücüm Kanada tarihında eñ çoq ölümge sebep oldı.
1989 senesi Quebecte kerçekleştirilgen ücüm qurbanlarınıñ sayısı buña yaqın edi. Atıcı Montreal universitetine kirip, 14 qadınnı atıp öldürdi.
