Link açıqlığı

Saatnıñ esas haberi

Kanada parlamenti Rusiyeniñ Ukrainağa qarşı areketlerini genotsid dep tanıdı – Stefançuk


Ottavadaki parlamento binası ögünde Kanada bayraqları, arhiv fotoresimi
Ottavadaki parlamento binası ögünde Kanada bayraqları, arhiv fotoresimi

Kanada parlamentiniñ Yuqarı palatası Rusiyeniñ Ukrainağa qarşı istilâsınıñ genotsid dep tanılmasına qoltuttı, dep bildirdi Ukraina Yuqarı Radasınıñ spikeri Ruslan Stefançuk aprelniñ 29-nda.

«Kanada Senatınıñ deputatları ve spikeri George Furey Ukraina halqına qarşı genotsidni tanığanları içün sağ olsunlar», – dep izaatladı o.

Stefançuknıñ aytqanına köre, Kanada Senatı bu künleri Kanada Cemiyetler palatası qabul etken qararnıñ aynısını qabul etti.

Aprelniñ 27-nde Kanada Cemiyetler palatası Rusiye Federatsiyasınıñ Ukrainada yapqanlarını Ukraina halqınıñ genotsidi dep tanıdı.

Aprelniñ 14-nde Ukraina Yuqarı Radası Rusiye ordusınıñ Ukrainada yapqanlarını Ukraina halqınıñ genotsidi olaraq tanıdı. Ukraina halq deputatları çetel devletleriniñ ükümetleri ve parlamentlerine muracaat etip, Rusiye ordusınıñ Ukrainada yapqanlarını Ukraina halqınıñ genotsidi olaraq tanımağa çağırdı.

Estoniya ve Latviya Rusiye silâlı quvetleriniñ areketlerini Ukraina halqınıñ genotsidi dep tanıdı.

Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG