Kanada Mudafaa naziri Harjit Singh Sajjan Qırım ilhaqınıñ beşinci yılında Ukraina halqına «Rusiye istilâsına qarşı» küreşinde qoltuttı.
«Kanada Ukrainağa qoltutmağa devam etecek. Rusiye istilâsı ve devam etken Qırım işğaliniñ beşinci yılını qayd etkende olar (ukrainalılar – QA) Ukrainanıñ telükesizlik ve istiqrarını pekitmek içün çalışqanı kibi bizler de ukrain halqınen beraber Rusiye istilâsına qarşımız», – dep aytıla nazirniñ Twitter mesacında.
Martnıñ 15-nde Kanada 114 şahıs ve 15 Rusiye şirketine qarşı Qara deñizde ukrain gemileri ve askerleri zapt etilgeninden sanktsiyalar kirsetti.
Rusiye Tış işler nazirligi Kanada ve ABDniñ Rusiyeniñ Qara deñizdeki istilâsı ve Qırım işğali içün kirsetken yañı sanktsiyalarını «eki taraflı munasebetlerniñ tamamen yoq etilmesine taba bir adım» dep adlandırdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
