Bağçasaraydaki «Hizb ut-Tahrir davasınıñ» mabüsi Memet Belâlovnıñ ömür arqadaşı Ediye mayısnıñ 6-nda onıñnen körüşken soñ sağlıq vaziyeti ve Aqmescit SİZOsındaki şaraitler aqqında tarif etti. Bu aqta «Qırım birdemligi» cemaat birleşmesi Facebookta haber ete.
«Apishane aşından aşqazanı ağıra, tibbiy yardım yaramay. Kerekli ilâclar berilmey. Memet tişleri tökülgenini ayta. Şahsiy tiş ekimini çağırmağa mecburlar. Kamerada tutuv şaraitleri yaramay. Er yerde furun böcekleri ve qandalaylar. 18 kişilik kamera, anda ise 22 insan tutula, nevbetnen yuqlaylar», – dep tarif etti Ediye Belâlova.
Memet semetdeşlerini mubarek Ramazan ayınen tebrikledi ve yardım etkenlerge teşekkürler bildirdi.
Rusiye Cezalarnı yerine ketirüv federal hızmetiniñ vekilleri Belâlovnıñ ömür arqadaşınıñ bu beyanatını izaatlamay.
2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
