13 yıllıq apis cezasına mahküm etilgen 65 yaşındaki qırımtatar faali ve "Qırım musulmanları davası"nıñ figurantı Servet Gaziyevni bu yılnıñ baarinde Rusiyeniñ Petropavlovsk-Kamçatka şeerindeki 5-nci apishanesine kelgen soñ tedaviylemek istemegenler, şimdi ise onıñ sağlıq vaziyeti fenalaşa. Bu aqta "Qırım birdemligi" cemaat birleşmesine onıñ qardaşı Svetlana Ablâmitova ikâye etti.
Servet Gaziyev tatasına 5-nci tüzetüv cezahanesiniñ hastahanesinde ekim-terapevt "ağır madde" sebebinden öksürikni tedaviylemekni başta red etkenini, amma soñra antibiotikler berip başlağanını bildirdi.
"Koloniyada oña alışılğan soñ", ekim qırımlığa antibiotikler bermege başladı. Ve tedaviylev kursundan soñ bile musulmannıñ muntazam sürette öksürik tutuluvları ola — olar yarım saatqa qadar devam ete bile", — dep yaza "Qırım birdemligi" Ablâmitovğa atıf etip.
Antibiyotiklernen tedaviylengen soñ Gaziyevniñ içekler problemleri kerginleşti ve o pek azdı, dep qayd ete onıñ tatası. Ekimler oña, adlarını aytmadan ine uralar.
2019 senesi saban ayınıñ 27-nde FSB, Rusiye İç işler nazirligi ve Rusiye gvardiyasınıñ hadimleri saban ayınıñ27-nde Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etkeninde qabaatlanğan 24 faal tutulğan edi.
2023 senesi qara qış ayınıñ 11-nde Servet Gaziyevni 13 yıl apis cezasına mahküm etti ve 1 yıl 6 ay müddetine areket azatlığınıñ sıñırlanması tayin etildi.
"Memorial" aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.