Avropa Birligi, Rusiyege qoltutqan Avropa ükümetleriniñ sayısı artsa da, birligini saqlap qala bile, dep ayttı yanvarniñ 14-nde AB tışqı ve telükesizlik siyaseti boyunca yüksek temsilcisi Kaya Kallas.
"Qıyın muzakerelerge baqmadan biz birlik saqlap oldıq. Kettilçe daa qıyın ola. Amma men alâ da eminim ki, biz bir noqta-i nazarnı taqdim ete bilemiz, çünki tek böyle etip biz quvetimizni saqlaycaqmız", — dep qayd etti o çarşenbe künü Brükselde jurnalistlernen körüşüvde, dep haber ete Radio Svoboda.
Rusiye prezidenti Vladimir Putin kerçekten barışıq istemey, ve esas mesele budır, dep bildirdi AB tışqı siyaset müessisesiniñ yolbaşçısı.
"O, quvetlerini toplamaq ve silâlandıruv içün ateş toqtatılmasını istey", — dep añlattı Kallas. Biz ateşniñ toqtatılmasını endi kördik. Rusiye iç bir vaqıt ateş toqtatılmasına riayet etmedi. Şunıñ içün Avropa içün barışıqnıñ devamlı olması pek müimdir.
"Ukraina ile bağlı qararnı Ukrainasız, Avropa ile bağlı qararnı ise Avropasız çezmek mümkün degil", — dep qoştı Kallas.
Avropa Birliginiñ Yuqarı temsilcisiniñ fikrince, Avropanıñ barışıq saqlav rolü aqqında tüşünmek pek erte, çünki Moskvanı şimdilik barışıq meraqlandırmay. Kallasnıñ fikrince, Avropa içün, Rusiyeden ziyade, barışıq kerek, çünki Rusiye, Avropa diplomatınıñ aytqanına köre, vaqıt Moskvanıñ faydasına çalışa, dep tüşüne.
Kallas, Ğarp Rusiyege qarşı iqtisadiy basqını quvetleştirmek kerek, dep qayd etti, Avropada Rusiye Federatsiyasınıñ para yedekleri tükengenini köreler. Rusiyeniñ neft ve gaz satışından kelirleri eksildi, emek bazarı "pek yaramay" vaziyette.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
