Rusiye ordusı Kahovka gidroelektrostantsiyasını patlatqan soñ on insan elâk oldı, 42 kişi ğayıp oldı, dep bildirdi Ukrayına İç işler naziri İğor Klımenko.
«Tam bilgen raqamlarımıznı ayta bilem: Herson vilâyetinde sekiz, Mıkolayıv vilâyetinde eki vatandaşımız can berdi. 42 kişi ğayıp oldı, yedisi bala», – dep bildirdi Klımenko Ukrayına telemarafonınıñ yayınında.
Onıñ aytqanına köre, işğal etilgen yerlerde sol tarafta elâk olğanlar aqqında haber kele, amma al-azırda İç işler nazirliginiñ tam malümatı yoq.
İç işler nazirligi bildirgenine köre, saat 13:00-te Herson vilâyetinde 46 mesken yer suv altında qala, 32-si (3801 ev) – kontrol etilgen yerde, 14-ü – işğal altında. 2743 insan tahliye etildi, 205- bala ve 76-sı areketi zor olğan kişi.
Mıkolayıv vilâyetinde 31 mesken yerni suv bastı, 982 insan tahliye etildi, 167-si bala.
Dnipropetrovsk vilâyetinde 32 mesken yerde aman-aman 165 biñ abuneci suvsız qaldı.
Klımenko aytqanına köre, suv basqan yerlerde suv seviyesiniñ «stabil eksilmesi» qayd etile, Herson vilâyetine diger regionlardan kommunal hızmet hadimleri ve mahsus tehnika ketecek.
«Hersonda komendant saatınıñ uzatıluvını teklif etecekmiz, gidroelektrostantsiyasınıñ diger aqibetlerini tez yoq ete bilmek içün», – dedi nazir Hersonda ştab toplaşuvı vaqtında.
İyünniñ 6-nda tañ atqanda Kahovka gidroelektrostantsiyasınıñ qısmen patlatılğanına dair haber keldi. Ukrayına Rusiyeni qabaatlay. Ukrayına telükesizlik hızmeti iyünniñ 9-nda bir subetni aydınlattı. Berilgen malümatqa köre, Rusiye arbiyi Rusiye diversion gruppası aqibetlerini bilmeyip patlattı, dep ayta. Subetniñ doğru olıp olmağanını tasdıqlamaq imkânsız.
Ukrayına akimiyeti bildirgenine köre, Rusiye arbiyleri Kahovka gidroelektrostantsiyasına patlayıcı qoyğan edi. Ukrayına vekilleri bent tış tesirge qarşı büyük yedeknen azırlanğan edi ve içinden patlatıldı, dep qayd ete.
Kreml bentniñ patlatıluvını Kyiv tarafından yapılğan «mahsus diversiya» dep adlandıra.
Ğarp vekilleri iyünniñ 6-na keçer gecesi bentniñ yoq etilüvini izaatlap, onı Rusiye patlattı demedi, lâkin Moskva bu adisede mesüliyetli ola, dep bildirdi – çünki bıltır fevralniñ 24-nde Rusiye Ukrayınağa qarşı tam silâlı istilâ başlatıp, Herson vilâyetiniñ bir qısmını (hususan Kahovka gidroelektrostantsiyasını) işğal etti ve onı uruş alanına çevirdi.
Bentniñ patlatıluvı neticesinde aşağıda olğan yerlerni suv bastı, yuqarıda qalğan suv anbarı ise suvsız qaldı. Onlarnen mesken yerni suv bastı, insanlar tahliye etile. Rusiye tahliyege baqmadan, Hersonğa ateş açmağa devam ete.
İyünniñ 10-nda Ukrayına İç işler nazirligi bildirgenine köre, Kahovka gidroelektrostantsiyasınıñ yoq etilüvi neticesinde 29 insan ğayıp olğan olaraq sayıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
