Büyük Britaniya istihbaratı Kahovka suv elektrik stantsiyasınıñ patlatıluvı sebebinden kelecek bir qaç kün devamında daa suv basuvı olacağını tahmin ete.
"Kahovka suv anbarında suvnıñ seviyesi dağıluvdan evel rekord seviyede yüksek edi ve bu aşağı aqıntıda suv basuvına sebep oldı. Bentniñ inşaatı kelecek bir qaç kün devamında daa çoq yıqılması ve qoşma suv basuvlarnen neticelenmesi ihtimalı bar", - dep bildirdiler Britaniya Mudafaa nazirliginde.
Britaniya arbiyleri, bentten 120 km uzaqlıqta yerleşken Zaporijjâ atom elektrik stantsiyasınıñ acele qoşma telükesizlik problemleri ile qarşılaşma ihtimalınıñ ufaq olğanına inana.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi. Mesleatçısı Mıhaylo Podolâk patlatuvnı Rusiye Silâlı quvetleriniñ 205-inci motor atıcı brigadası yaptı, dep tahmin etti.
Ukrayina milliy telükesizlik ve mudafaa şurasınıñ kâtibi Oleksiy Danılov Kahovka Kahovka suv elektrik stantsiyasınıñ patlatıluvı «Rusiye istilâsınıñ yañı basamağı» ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
