İyünniñ 9-nda saat 12-de mevcut olğan malümatqa köre, Herson vilâyetinde Kahovka suv elektrik stantsiyasınıñ dağıluvından sebep 4 kişi elâk olğan, daa 13 bellisiz ğayıp olğan. Mıkolayiv vilâyetinde de 1 kişi ölgen. Bunıñ aqqında Ukrayina İç işler nazirliginiñ beyanatında haber etile.
Herson vilâyetinde 48 mesken yer suv tübüne ketken, olardan 34-ü Ukrayina nezareti altında olğan topraqlarda ve 14-ü vaqtınca işğal etilgen qısımlarda.
Zarar körgen bölgelerden 2412 insan tahliye etilgen. Tahliye vaqtında işğalciler ateş açqanından sebep 11 adam yaralanğan
Mıkolayiv vilâyetinde 23 mesken yerni suv basqan. Andan 825 insan tahliye etilgen.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi. Mesleatçısı Mıhaylo Podolâk patlatuvnı Rusiye Silâlı quvetleriniñ 205-inci motor atıcı brigadası yaptı, dep tahmin etti.
Ukrayina milliy telükesizlik ve mudafaa şurasınıñ kâtibi Oleksiy Danılov Kahovka Kahovka suv elektrik stantsiyasınıñ patlatıluvı «Rusiye istilâsınıñ yañı basamağı» ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
