Qırımtatar halqı Milliy Meclisi, Kahovka suv elektrik stantsiyasınıñ patlatıluvını takbih etti ve halqara gumanitar uquqnı bozmaqta suçlu olğan Rusiye Federatsiyası ve vatandaşları içün hususiy tribunal teşkil etmege çağırdı. Bunıñ aqqında Meclis reisi Refat Çubarovnıñ beyanatında yazıla.
Meclis prezidiumı, "Rusiye arbiyleri tarafından Kahovka suv elektrik stantsiyası bentiniñ ve yapılarınıñ patlatıluvı eñ müim kritik infraterkipniñ qasten yoq etilüvine, ealiniñ ve çiftçilikniñ içimli suvdan marum etilüvine, Dnipro ve Qara deñizniñ ekosistemasınıñ yoq etilüvine yönetilgen arbiy cinayettir", dep qayd etti.
Prezidium BMT, OSCE, Avropa Şurası, Avropa Birligi ve NATO kibi halqara teşkilâtlarnı "Rusiye Federatsiyasını Ukrayina topraqlarından askerlerini çekmege mecbur etilmesine ve Ukrayina topraqlarında arbiy cinayetler etken Rusiye memurlarını ve siyasetçilerini mesuliyetke celp etilmesine" yönetilgen tedbirlerni deral baqıp çıqmağa çağırdı.
Bundan ğayrı Meclis dünya tamır halqlarını temsil etken teşkilâtlarnı Kahovka suv elektrik stantsiyasınıñ bentiniñ patlatıluvını açıq şekilde ayıplamağa davet ete.
İyünniñ 6-nda saba Rusiye Herson vilâyetinde Kahovka suv elektrik stantsiyasını patlattı, dep bildirdi Ukrayina arbiyleri.
Ukrayına prezidenti ofisiniñ yolbaşçısı Andriy Yermak Kahovka Kahovka suv elektrik stantsiyası bentiniñ bozuluvı Qırımnı içilgen suvsız qaldıra bile, dep bildirdi. Mesleatçısı Mıhaylo Podolâk patlatuvnı Rusiye Silâlı quvetleriniñ 205-inci motor atıcı brigadası yaptı, dep tahmin etti.
Ukrayina milliy telükesizlik ve mudafaa şurasınıñ kâtibi Oleksiy Danılov Kahovka Kahovka suv elektrik stantsiyasınıñ patlatıluvı «Rusiye istilâsınıñ yañı basamağı» ola, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
