Rusiye, iyünniñ 6-nda bentniñ yıqıluvından soñ 59 insan boğuldı, dep bildirdi.
AP tahqiqatı, o vaqıt 16 biñge yaqın ealisi ile suv basuvından zarar körgen rayonlarnıñ eñ çoq ealisi olğan Rusiye tarafından işğal etilgen Oleşki şeerinde eñ azından yüz insan elâk olğanını qayd etti.
Oleşkada elâk olğanlarnıñ tam sayısı, ukrayin quvetleri topraqnı qaytarıp, anda tahqiqat keçire bilecek olsa bile, iç bir vaqıt belli olmaycaq, dep ayta jurnalistler.
Agentlikniñ qayd etkenine köre, Rusiye akimiyeti ölümi aqqında şeadetnamelerniñ berilmesini nezaret altına aldı, tuvğanları bildirmegen insanlarnıñ cesetlerini acele sürette alıp ketti, yerli tibbiyet hadimleri ve göñüllilerge ölgenlernen oğraşmağa izin bermedi, emirlerge riayet etmegenlerni öldürüv ile qorquzdı.
İyünniñ 6-nda saba Rusiye Herson vilâyetinde Kahovka suv elektrik stanstiyasınıñ bentini patlattı, dep bildirdi ukrayin arbiyleri. Ukrayina prezidenti Ofisiniñ yolbaşçısı Andriy Yermak, GES bentiniñ bozulması Qırımnı içme suvundan marum ete bile, dep bildirdi. Rusiye işğalci akimiyeti, gece arbiy quvetleri ateş açtı ve Kahovka suv elektrik stanstiyasınıñ bentini bozdı, dep iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
