Bütünley quruğan Kahovka suv anbarını ot basıp başladı. Ot urluqları quruğan topraqnıñ çatlaqlarından çıqa. Azatlıq Radiosınıñ «Novını Prıazovya» leyhasınıñ mühbiri Dmitriy Şeremet suv anbarını Zaporijjâ vilâyeti tarafından çıqardı.
Ukrayınağa qarşı büyük istilâ başlağanda Rusiye ordusı Kahovka gidroelektrostantsiyasını zapt etip, Kahovka suv anbarınıñ bentini kontrol altına aldı. Rusiye arbiyleri Kahovka gidroelektrostantsiyasına mayın qoydı, bunı hadimleri bildirgen edi.
2023 senesi iyunniñ 6-nda saba üçlerde Kahovka gidroelektrostantsâsı bulunğan suv anbarınıñ benti bozuldı.
O gece gidroelektrostantsiyanı kontrol etken Rusiye 205-inci motoatıcılıq brigadasınıñ askerleri «azır olıp», «er yerni suv basqanı içün» «ketüv noqtasından» «emirden soñ» ketmege azırlanğan edi. Bunı Shemı (Azatlıq Radiosınıñ leyhası) ve Slidstvo.İnfo agentliginiñ jurnalistleri yapqan tedqiqatta subet qaydları köstere.
