«Ukrğidroenerğo» baş müdiri İğor Sırota Kahovka gidroelektrostantsiyasında üç yerde «pek küçlü patlav» oldı, dep bildirdi.
O, ekspertiza yapılsa, bunı isbatlar, dep eminliknen ayta.
«Dambanı patlatmaq içün – Kahovkada olğanı kibi – bir yerge eñ az üç yarım tonnalıq bomba atmaq kerek. Bunı bir raketanen yapmaq mümkün degil. Stantsiyanıñ üç yerinde pek küçlü patlav oldı. Stantsiyanı baqqanda ekspertiza bunı isbatlaycaq», – dep ayttı o, Ukrayına milliy telemarafonınıñ yayınında.
Sırota aytqanına köre, suv basuv meydanı gidroelektrostantsiyanıñ zararına bağlı. «Ukrğidroenerğo» baş müdiri qayd etkenine köre, suv şiddeti eksile.
«Kahovka suv anbarınıñ 13 köstergiçine yaqınlaşıp, «ölü alanğa» kelemiz – 12,7 metr. Bundan soñ ne atom elektrostantsiyasını suvutmaq, ne de vilâyetlerge suv alınmaycaq», – dep qoştı o.
The New York Times neşiri ekspertlerniñ malümatına esaslanıp, Kahovka gidroelektrostantsiyasınıñ bozuluv sebebi içinden patlatuv olğandır, dep yazdı.
Ukrayına Milliy telükesizlik ve mudafaa şurasınıñ kâtibi Öleksiy Danılovnıñ fikirince, Rusiye arbiyleri Kahovka gidroelektrostantsiyasını Kremlniñ emrinen patlatqandır. Onıñ fikirince, bıltır sentâbr-oktâbr aylarında qoyulğan patlayıcı qullanılğandır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
