Qırımnıñ Rusiye yolbaşçısı Sergey Aksenov Kahovka gidroelektrostantsiyasınıñ patlatıluvını izaatladı. Onıñ aytqanına köre, Şimaliy-Qırım kanalınıñ quruv telükesi bar.
Onıñ bildirgenine köre, kanalnıñ suv yedekleri – tahminen 40 mln kubometr. «Evelden 15-20% tolu olğan suv anbarları bile şimdi 80% tolu», – dep qayd etti Aksenov Telegram kanalında.
Kanalda suv ğayıplarını «eksiltüv» işleri keçirile, eñ yaqın künleri dinamika ve telükeler añlaşılacaq, dep qoştı yarımadanıñ Rusiye yolbaşçısı.
Ukrayına prezidenti ofisiniñ yolbaşçısı Andriy Yermak Kahovka gidroelektrostantsiyası bentiniñ bozuluvı Qırımnı içilgen suvsız qaldıra bile, dep bildirdi.
«Bu bir ekotsid. Rusiyeliler Herson vilâyetiniñ cenübinde ve Qırımda insanlarnı içilgen suvsız qaldırğanları içün cevap berecek, bazı mesken yerler ve biosfera yoq etile bile», – dep aytıla haberde.
Aynı vaqıtta Aqyarnıñ Rusiye yolbaşçısı Mihail Razvojayev şeerniñ suv teminlevine tesir etmeycek, dep ayta. «Şeer öz suv anbarını qullana, suv yedekleri tolu, yedek suv çoqraqları da bar», – dep qayd etti o.
İyünniñ 6-nda saba Rusiye Herson vilâyetinde Kahovka gidroelektrostantsiyasını patlattı, dep bildirdi Ukrayına arbiyleri. Herson vilâyetiniñ arbiy memuriyet yolbaşçısı Oleksandr Prokudinniñ aytqanına köre, 5 saattan soñ suv kritik seviyege kelecek, telükeli rayonlardan sakinler tahliye etilip başlandı.
Herson vilâyetiniñ arbiy memuriyeti Dnipronıñ sağ tarafında suv basa bilecek yerlerni ayttı. Mıkolayıvka, Olğivka, Lvove, Tâğınka, Ponâtivka, İvanivka, Tokarivka, Pridnestrovye, Sadove köyleri ve qısmen Herson şeeri – Korabel adası.
Ukrayına prezidenti Volodımır Zelenskıy Milliy telükesizlik ve mudafaa şurasını acele topladı. Ofisiniñ yolbaşçısı Andriy Yermak Kahovka gidroelektrostantsiyasınıñ patlatıluvını «ekotsid» dep adlandırdı.
«Energoatom», gidroelektrostantsiyanıñ patlatıluvı Rusiye ordusı işğal etken Zaporijjâ atom elektrostantsiyası içün menfiy aqibetlerniñ sebebi ola bile, amma vaziyet kontrol etile, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
