Sentâbr ayından başlap Çeçenistan yolbaşçısı Ramzan Kadırovğa ait uçaq üç kere Moskvağa uçtı, soñki üç kün ise Rusiye paytahtında qaladır, dep haber ete«Verstka».
Neşirniñ malümatına köre, RA-73417 nomeralı biznes-cet Moskvada sentâbrniñ 6-nda ve 9-nda qondı. Soñki sefer Çeçenistan paytahtı Groznıyden Moskvağa o, sentâbrniñ 15-nde ketti, o vaqıttan berli Çeçenistanğa qaytmadı.
«Verstka» Çeçenistan yolbaşçısınıñ sağlığı fenalaşqan ve Rusiye prezidentiniñ işleri idaresiniñ Moskva Merkeziy klinik hastahanesinde tedaviylengenine dair öşeklerden soñ uçaq areketlerine emiyet berdi. Afta ortasında bir qaç çeçen muhalifet kanalı menbalarını aytmayıp, Kadırov komada buluna, dep haber etti. Sentâbrniñ 17-nde çeçen muhalifetçisi ve aq qorçalayıcı Abubakar Yangulbayev Kadırov vefat etti, dep yazdı.
Aynı vaqıtta Kadırovnıñ Telegram kanalında onıñ iştirakinen video peyda oldı. Çeçenistan yolbaşçısı alleyada ketip, «internette yalanlarnı doğru haberlerden ayıramağanlarğa taze avağa kelmege» tevsiye ete. Kadırov sağlığı aqqında bir şey aytmay. Video Groznıyde çıqarıldı, dep aytıla, amma qayda ve ne vaqıt belli degil.
Rusiye uquq qoruyıcı organlarınen bağı mümkün olğan VÇK-ÖGPU Telegram kanalı menbalarına esaslanıp, bazar sabasından berli Merkeziy klinik hastahanege çeçen nomeralı maşinalar kele ve olarnı baqmayıp kirseteler, dep bildirdi.
Yılnıñ başından berli kütleviy haber vastalarında 46 yaşında Ramzan Kadırov ağır hasta dep ara-sıra haberler çıqa. Jurnalistler Çeçenistan reberiniñ beti şişken, dep qayd ete. Bunıñ sebebi qanser ola bile, dep tahmin eteler. Kadırovnıñ özü sağlıq vaziyeti fenalaşqanına dair malümatnı inkâr etken edi.
Çeçenistan yolbaşçısı – Ukrayınağa qarşı cenkniñ tarafdarlarından biridir, amma bir qaç kere Rusiye Mudafaa nazirligini tenqit etken edi. Kadırov iyün ayında Rusiyede isyan çıqarmağa tırışqan ve avgust ayında elâk olğan «ÇVK Vagner» gruppirovkasınıñ qurucısı Yevgeniy Prigojinge qoltutqan edi. İsyandan evel Kadırov ve Prigojin halq ögünde qavğa etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
