Çeçenistan yolbaşçısı Ramzan Kadırov Qırım musulmanları diniy idaresiniñ yolbaşçısı Ayder Rustemovnen taqiplernen qorquzmağa tırıştı – o, müftiniñ esir çeçenlernen laf etkenini böyle izaatladı. Siyasetçi esirler Rusiyege qaytarılsa, Rustemovdan intiqam almaq içün birden cenkke qaytmalı, dep bildirdi.
Yanvarniñ soñunda ukrayınalı bloger Volodımır Zolkinniñ kanalında Qırım müftisiniñ aralarında beş çeçen arbiyi olğan cenk esirlerinen subeti derc etildi. Rustemov Ukrayınağa qarşı cenk cinayeti ve ne içün oña Çeçenistan akimiyeti adlandırğan cihat aytmağa olmağanını ayttı. Müfti esir musulmanlarnen ekinci kere körüşe, evelki körüşüv keçken seneniñ avgust ayında oldı.
Bundan soñ Ramzan Kadırov Qırım müftisi esirlerni aşalamağa tırışıp, saylağan yollarını qarartmağa tırıştı, dep bildirdi.
«Qayda olsañ-ol, şahsen özüm senden esap isteycem… [Esirler] qaytsa, ög sırağa barmalı ve seni tapmalı», – dedi Kadırov. O, esir çeçenler ukrayınalı din adamınıñ aytqanlarınen razı olmağa mecbur edi, dep qoştı.
Oktâbr ayında Çeçenistan yolbaşçısı esir tüşken Ukrayına arbiylerinen rezidentsiyasında laf etken edi – balaları Ukrayınağa barğan soñ bir qaç insan oña ketirilgen edi. Kadırov Kyiv akimiyeti seferber etilgen ukrayınalılarnı nişan olaraq qullandı, dep bildirdi. Olar ise cenkte iştirak etkenlerini manasız olaraq adlandırıp, Rusiye propagandasınıñ aytqanlarını seslendirdi.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2016 senesi noyabr ayında Qırımdan köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
