Paytahtnıñ başı Vitaliy Klıçko, qurtarıcılar tünevin aqşam saatlırında Rusiye arbiyleri tarafından ateşke tutulğan Kıyivde mesken evniñ dağıntıları altında ceset tapqanlarını bildirdi.
"Tünevin aqşam raketanıñ tüşken Şevçenko rayonında mesken evniñ dağıntılarınıñ teşkerilüvini ve temizlenüvini devam etken qurtarıcılar ceset taptılar", - dep yazdı o.
Evel şeer memurları qazağa oğrağan on kişi aqqında haber etken eideler, olarnıñ dörtü hastahanege yatqızılğan.
Kyivniñ şeer yolbaşçısı Vitaliy Klıçko aprelniñ 28-nde Rusiye ordusınıñ paytahtnıñ Şevçenko rayonına ateş açqanını bildirdi.
Ukrayina prezidenti Volodımır Zelenskıy, Rusiyeniñ BMT-nıñ baş kâtibi ile körüşüv tamamlanğan soñ Kıyivni deral atekşe tutqanını bildirdi.
Onıñ sözlerine köre, Rusiye tarafından Kıyiv, Fastiv, Odesa, Hmelnits ve diger şeerlerniñ ateşke tutulması "raatlanmaq daa erte" olğanını köstere.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
