Kıyivde Rusiye ücüminiñ neticesinde dört insan yaralandı, episi hastahanege alındı, dep bildirdi şeer yolbaşçısı Vitaliy Kliçko.
Şeerniñ arbiy memuriyetiniñ yolbaşçısı Timur Tkaçenkonıñ qayd etkenine köre, Kıyivniñ yedi rayonı zarar kördi.
"Gece devamında duşman Kıyivni ücüm uçaqları ile toqtamayıp terror etti. Vatandaş infrastrukturası ve şeer sakinlerine ücüm etti... Paytahtnıñ yedi rayonı zarar kördi. Çoq qatlı binalarda ve şahsiy evlerde yanğın çıqtı ve parçalar tüşti. Maşnalar ve anbarlar yandı", — dep qayd etti Tkaçenko.
O, qayd etti ki, "bu aqibetlerni tüzetmek içün vaqıt kerek olacaq".
Parçalarnıñ tüşmesi ve bozulmalar Desnânsk, Şevçenko, Podol, Darnıtsâ, Obolon, Ğoloseyevo, Solomensk rayonlarında qayd etildi.
Ukrayina Silâlı quvetleriniñ ava quvetleri ilk yaz ayınıñ 10-na keçken gecesi Rusiye arbiyleri Kıyivge kütleviy sürette ücüm etkenini ve raketalar qullanğanını bildirgen edi.
Rusiye akimiyeti, Rusiye ordusı, tam kölemli cenk vaqtında, Ukrayina şeerleri ve köyleriniñ grajdan infrastrukturalarına, tınç sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
