Dekabrniñ 29-nda Kıyivge Rusiye tarafından endirilgen raketa darbesinde 28 kişi elâk oldı, dep bildirdi şeerniñ arbiy memuriyeti.
Qurtarıcılar viranelerden daa bir cesetni çıqardılar. Şimdilik dekabrniñ 29-nda raketa ücümleri neticesinde 28 insan öldürildi, dep aytıla KMVA yolbaşçısı Sergey Popkonıñ bildirmesinde.
Bundan evel Popko, qurtarıcılar daa dört ölü tapqanını bildirdi. Qıdıruv-qurtaruv ameliyatı devam ete.
Yanvarniñ 1-i Kıyivde matem künü olaraq ilân etilgen.
Dekabrniñ 29-na keçken gecesi Rusiye Ukrayina territoriyasına eñ büyük ücümlerden birini yaptı, 158 uçucısız uçaq ve raketalar, olarnıñ arasında beş X-47M2 "Kinjal" aerobalistik raketa bar edi. Ücüm neticesinde 40-tan ziyade insan elâk oldı.
Büyük cenk başlağanından berli Rusiye arbiyleri Ukrayinağa 7500 raketa attı, dep bildirdi Ukrayina Arbiy ava quvetleriniñ spikeri Yuriy İgnat.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
