Sentâbrniñ 15-ne keçken gece Ukrayina prezidenti Volodımır Zelenskıynıñ arabası onı refaqat etken kotrtej ile beraber yol qazasına oğradı.
Ukrayina devlet başınıñ matbuat kâtibi Sergey Nikiforof haber etkeni kibi, Zelenskıy zarar körmegen.
"Prezidentni ekim baqtı, ciddiy zararlanmalar yoq. Yol qazasınıñ sebeplerini qanun qoruyıcılar ögreneler", - dep haber etti Nikiforov.
UNİAN ukrayin agentligi qaza yüz bergen yerden video yayınladı. İlk malümatqa köre, yol qazası saat 00:00 Kıyivde Ğalebe meydanından olğan.
Sentâbrniñ 14-nde Volodımır Zelenskıy ve prezident ofisiniñ yolbaşçısı Andriy Yermak işğalden azat etilgen Harkiv vilâyetiniñ İzüm şeerini ziyaret ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
