Kıyivde fevralniñ 25-nde Qırım evinde Qırım Daily media teşebbüsiniñ ve Qırım evi taqımınıñ destegi ile "KrımSOS" leyhası tarafından teşkil etilgen "YILLAR VE YOLLAR" Qırımnıñ eski fotoresimler sergisi açılacaq.
YILLAR VE YOLLAR sergisiniñ maqsadı qırımtatarlarnıñ medeniyeti ve yaşayışını fotoresimler vastasınen köstermektir. Fotoresimlerniñ çoqusı 1900 ve 1925 seneleri arasında yapılğan. Teşkilâtçılarnıñ aytqanına köre, o, "XX asırnıñ başındaki aqiqiy Qırımnı kösterip, tarihiy hatıralarnı ğayrıdan tiklemege ve yarımadanıñ kerçek obrazını şekillendirmege yardım etecek".
"Men, sergi musafirleriniñ vaqıt sıñırınıñ silingenini is etmesini isteyim. Birlikte tanış yollardan keçkenimizni; tuvğan avadan teren nefes alğanımıznı; o vaqıtları insanlarnıñ yaşayışı nasıl olğanını tasavur etkenimizni isteyim", — dep ayttı @qırım_photoarchive blogınıñ müellifi Tenzile Topalova.
"11 yıl evelsi menim Qırım yolum başladı — yarımadanıñ Rusiye işğali sebebinden Ukrayinanıñ qıtaiy qısmına ağır, istenilmegen, planlaştırılmağan çıqışım. Yaltada yürek parçamnı qaldırğan soñ, bu mubarek topraqnıñ küçük bir qısmı aqqında hatıralarımnı köstermek içün yanıma fotoresimlerni aldım. Amma endi 11 yıldan berli başqa yolnen ketem — Qırımğa qaytmaq yolunen. Ve bugün bu yolda, "YILLAR VE YOLLAR" sergisini körip, yarımadamıznıñ ruhunı, tarihını ve ayatını duyam ve evge qaytmaqnı planlaştıram", — dep qoştı "KrımSOS" koordinatorı Mila Şevçenko.
Sergi Kıyiv vaqtınen saat 17:30 açılacaq ve müddetsiz olacaq. Kiriñ serbest.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
